Policia e Durrësit ka arrestuar autorin e dyshuar të zjarrit që përfshiu një magazinë pranë fabrikës së çimentos në Shkozet, duke shkaktuar dëme të mëdha materiale dhe ndërprerje të energjisë elektrike në një pjesë të qytetit.
Në pranga është vënë shtetasi Admir Ndoja, 38 vjeç, banues në Durrës. Sipas hetimeve të kryera nga Strukturat për Hetimin e Krimeve të Komisariatit të Policisë Durrës, ai kishte ndezur zjarr për djegien e barishteve në lagjen nr. 14, pranë magazinës së një subjekti privat.
Flakët dolën jashtë kontrollit dhe u përhapën me shpejtësi, duke përfshirë magazinën dhe shkaktuar dëme të konsiderueshme materiale. Si pasojë e zjarrit, u dëmtua edhe rrjeti elektrik, çka solli ndërprerje të furnizimit me energji në një pjesë të Durrësit.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme.
/vizionplus.tv
