Kryetari i Partisë Demokratike, Sali Berisha, ka përshëndetur protestën e banorëve të Poliçanit kundër reformës territoriale, duke e cilësuar qëndrimin e tyre si një akt mbrojtjeje të interesit të komunitetit.
Në një konferencë për mediat, Berisha tha se opozita do të paraqesë propozimin e saj për ndarjen territoriale, i cili, sipas tij, do të ishte objekt diskutimi me qytetarët dhe do të lejonte sugjerime apo ndryshime nga komunitetet.
Lexo edhe :
Related Posts
Sipas Berishës, mazhoranca është tërhequr në mënyrë të njëanshme nga procesi i konsultimit dhe ka paraqitur një reformë që, sipas tij, dëmton zonat lokale dhe thellon shpopullimin.
Duke iu referuar protestës në Poliçan, Berisha tha se banorët, pavarësisht bindjeve politike, u treguan “patriotë të vërtetë” duke mbrojtur bashkinë e tyre. Ai i bëri thirrje edhe banorëve të bashkive të tjera që preken nga reforma të ndjekin të njëjtin shembull dhe të kundërshtojnë ndryshimet e propozuara.
“Do ta mbyll duke përshëndetur banorët e Poliçanit, u treguan patriotë të vërtetë, çfarëdo që ishin, pa parti, socialistë, demokratë.
Me mbrojtjen që i bënë bashkisë së tyre, ata mbrojnë një të drejtë, ata mbrojnë një qeverisje që i duhet Shqipërisë për zhvillimin e saj dhe ndalimin e shpopullimin.
Shembulli i banorëve të Poliçanit duhet të frymëzojë, dhe jam i sigurt që do frymëzojë, banorët e të gjitha komunave që Edi Rama me një të rënë të lapsit u bie kryq vetëm për qëllime të zeza elektorale dhe mafioze të pasurimit të tij për të centralizuar gjithçka sa më shumë në duart e tij.
Dhe ftoj të gjithë banorët e bashkive të tjera të ndjekin shembullin e tyre”, tha Berisha.
Berisha akuzoi qeverinë se synon centralizimin e pushtetit dhe marrjen e vendimeve pa konsultim me komunitetet, ndërsa theksoi se reforma territoriale duhet të bazohet në interesin e qytetarëve dhe zhvillimin e zonave të vendit.
