Dinamikat që po zhvillohen së fundmi në vende të ndryshme të botës, kanë ndikimin e tyre herë të drejtpërdrejtë e herë të tërthortë tek secili nga ne. Duke jetuar në një epokë me gjithnjë e më pak kufij, është thuajse pamundur të shmangësh ndikimin e një dukurie sado larg gjeografikisht qoftë ajo. Ndaj sot, të gjithë ndiejmë efektet e një krize botërore, që përkthehet në rritje çmimesh që nga faturat e ngrohjes deri te produktet ushqimore.
Por ndryshimet e vogla në rutinën tuaj mund të kenë një ndikim vërtet pozitiv, kështu që më poshtë po listojmë tre hapa të thjeshtë për të ulur koston e dushit tuaj të përditshëm dhe për t’ju kursyer një vlerë të konsiderueshme parash përgjatë një viti.
Tre ndryshime të vogla në rutinën tuaj të dushit për të ulur kostot:
Ngadalësoni rrjedhjen e ujit: Një kokë dushi me rrjedhje të ulët redukton përdorimin e ujit pa ndikuar në presion. Nëse keni një matës uji, atëherë përdorimi më i ulët është i barabartë me fatura më të ulëta, kështu që një kokë dushi më efikase mund t’i kursejë një familjeje tipike rreth 9500 lekë të reja në vit.
Por edhe nëse nuk keni një të tillë, do të ngrohni më pak ujë, gjë që mund të zvogëlojë faturat tuaja të energjisë me 8000 lekë të reja në vit.
Kohëzgjatja e duhur: Shumica prej nesh kalojnë rreth shtatë minuta në dush.
Por nëse e gjithë familja do të dilte vetëm një minutë më herët, do të kurseni rreth 8800 lekë të reja në kostot e energjisë, këshillon “Energy Saving Trust”.
Temperatura e duhur e ujit: Nëse kur hapni rubinetin ju del uji shumë i nxehtë e më pas duhet ta ekuilibroni me ujin e ftohtë, po shpenzoni para duke ngrohur ujin në mënyrë të panevojshme.
Sigurohuni që te parametrat e bolierit të ujit të keni edhe alternativën “temperatura e rrjedhjes” që përcakton se sa i nxehtë është uji. Aplikimi i kësaj mund të reduktojë në 8% çmimin e faturës së energjisë.
Mos neglizhoni rëndësinë e hapave të vegjël të përditshmërisë suaj, për të pasur rezultate të kënaqshme në një afat të gjatë kohor.
