Pesë turistë gjermanë humbën orientimin pasditen e djeshme në Malin e Çikës, në një terren të vështirë dhe të thepisur.
Pas njoftimit të marrë rreth orës 18:00, Njësia Delta u nis menjëherë drejt zonës së quajtur Maja e Qorres për lokalizimin dhe shpëtimin e tyre.
Forcat e shpëtimit arritën të lokalizojnë të pesë turistët. Sipas informacioneve paraprake, katër prej tyre janë në gjendje të mirë shëndetësore, ndërsa njëri nuk është në gjendje të ecë për shkak të gjendjes së tij fizike.
Aktualisht, efektivët e Njësisë Delta po shoqërojnë grupin drejt një zone të sigurt, ndërsa turisti i dëmtuar po transportohet në krahë me mjete rrethanore, për shkak të terrenit tepër të vështirë.
Operacioni i shpëtimit vijon ende, pasi distanca dhe kushtet e terrenit e bëjnë të vështirë evakuimin e plotë të turistëve. Autoritetet pritet të japin detaje të tjera pas përfundimit të operacionit.
