Gjykata e Durrësit ka zhvilluar seancën për caktimin e masës së sigurisë ndaj ish-drejtoreshës së filialit të Postës Shqiptare në Durrës, ish-shefes së financës dhe arkëtares, të arrestuara tre ditë më parë në kuadër të hetimeve për një abuzim të dyshuar me fondet e institucionit.
Në përfundim të seancës, gjyqtari Xhevdet Lika vendosi masën “arrest me burg” për ish-drejtoreshën Elisabeta Mataj, ndërsa ndaj ish-shefes së financës Valbona Duni dhe arkëtares Paola Dana u caktua masa e sigurisë “arrest në shtëpi”.
Lexo edhe :
Sipas Prokurorisë, gjatë seancës janë paraqitur detaje të reja nga hetimi. Organi i akuzës ka deklaruar se ish-drejtoresha Mataj rezulton frekuentuese e kazinove. Nga ana e saj, Mataj është shprehur se ligji nuk e ndalon të frekuentojë bare apo kazino. E pyetur për fatin e shumës së munguar, ajo ka deklaruar se nuk di se ku kanë përfunduar paratë.
Tre ish-zyrtaret u arrestuan pas hetimeve të nisura nga Prokuroria, pas dyshimeve për mospasqyrimin në arkë të shumës prej 69 milionë lekësh të rinj, fonde të destinuara për degët e Postës Shqiptare në Shijak dhe Krujë, për shpërndarjen e pensioneve dhe ndihmave sociale.
Sipas dosjes hetimore, ato dyshohen se gjatë muajve prill dhe maj 2026 kanë përvetësuar shumën që ishte planifikuar të arkëtohej nga filiali i Postës Shqiptare në Durrës.
Ndalimi i tyre u krye në kuadër të procedimit penal të regjistruar nga Prokuroria për veprat penale “Shpërdorimi i detyrës” dhe “Vjedhja duke shpërdoruar detyrën”, të kryera në bashkëpunim. Hetimet për zbardhjen e plotë të rastit vijojnë.
