Instituti i Shëndetit Publik ka përfunduar draftin teknik për hapjen e shkollave në 14 shtator. Drejtoresha e ISHP shpjegon Albana Fico shpjegon dy shtyllat bazë, mbi të cilat janë ndërtuar protokollet që garantojnë shëndetin dhe sigurinë e nxënësve.
“Është një draft, i cili po diskutohet, merr parasysh dy gjëra shumë të rëndësishme. Një shmangie e kontaminimit në shkolla dhe së dyti vlerësimin e rrezikut në rast se dikush do të kishte simptomat e COVID-19.”
Por drejtoresha e ISHP, apelon se vetëm protokollet nuk mjaftojnë për të garantuar shëndetin e fëmijëve.
“Të gjithë të kuptojmë, kjo hapje do të jetë e suksesshme nëse autoritetet shëndetësore, autoritetet e arsimit dhe qytetarët do ta bëjnë të mundur, sepse protokollet janë shumë të mira zbatueshmëria e tyre është thelbësore për të pasur një vit shkollor të suksesshëm .”
Nga ana tjetër autoritetet po përgatiten për stinën e vjeshtës e dimrit, ku situata do të jetë më e vështirë dhe për shkak te gripit sezonal.
“Përveç përgatitjeve për COVID, dyfishimi i testimit, rritja e uniteteve lëvizëse, shtimi i flotës, kapaciteti njerëzor në terren përfshin edhe vaksinimin e popullatës disafish më shumë.”
Fico shpjegon situatën aktuale duke analizuar jo vetëm numrin e personave te infektuar, por edhe pacientet e shtruar në spital dhe ata që janë në terapi intensive.
Sipas drejtoreshës se ISHP, pavarësisht se testimet tani kryhen edhe nga laboratorët private, peshën kryesore në gjurmimin e koronavirusit e mban ISHP.
