Tiranë – Një operacion i zhvilluar nga Komisariati i Policisë Nr. 4 ka çuar në zbardhjen e gjashtë rasteve të vjedhjes së motomjeteve të ndodhura gjatë dy muajve të fundit në kryeqytet.
Në kuadër të operacionit të koduar “Remove”, u bë i mundur identifikimi, kapja dhe arrestimi i një 33-vjeçari, i cili dyshohet se vidhte motomjete, i çmontonte në pjesë dhe më pas i shiste ato në subjekte të ndryshme që tregtojnë pjesë automjetesh.
Sipas burimeve policore, në pranga është vënë shtetasi Ermond Gjina, banues në Tiranë. Gjatë kontrollit të ushtruar në banesën e tij, uniformat blu kanë gjetur dhe sekuestruar pjesë të ndryshme motomjetesh, të cilat dyshohet se i përkasin mjeteve të vjedhura.
Nga hetimet paraprake rezulton se 33-vjeçari është autor i dyshuar i gjashtë vjedhjeve të motomjeteve, të kryera gjatë muajve mars dhe prill 2026.
Në vijim të veprimeve procedurale, është proceduar penalisht edhe një shtetas tjetër, 39 vjeç, i identifikuar me inicialet Y. D., i cili dyshohet se ka përvetësuar një motomjet dhe pjesë të vjedhura nga i arrestuari.
Policia bën me dije se hetimet vijojnë për të dokumentuar raste të tjera të mundshme vjedhjesh që mund të jenë kryer nga i arrestuari.
Materialet procedurale i janë referuar Prokurorisë për veprime të mëtejshme.
/vizionplus.tv
