Në Gjykatën e Posaçme kundër Korrupsionit dhe Krimit të Organizuar ka vijuar procesi ndaj Artan Tafanit, ku në seancën e sotme është dëgjuar dëshmia e një dëshmitari okular lidhur me atentatin ndaj Kujtim Metës, ngjarje e ndodhur më 20 prill 2022 në Lushnjë.
Dëshmitari Juxhin Kajdo ka deklaruar se në momentin e atentatit ndodhej në një lokal së bashku me vëllain e tij. Sipas dëshmisë, ai është fshehur poshtë një makine gjatë të shtënave, ndërsa më pas ka dëgjuar thirrje për ndihmë.
Ai ka treguar se e njeh Metën si banor të lagjes “18 Nëntori” në Lushnjë dhe se ngjarja ka ndodhur pranë zonës së stacionit të trenit, në një lokal ku frekuentuesit ishin kryesisht taksistë dhe punëtorë të zonës. Sipas tij, Meta është ulur në një tavolinë jo shumë larg tyre dhe pak minuta më pas ka ndodhur sulmi.
Për atentatin, autorësinë e ka marrë Artan Tafani, bashkëpunëtori i drejtësisë, i cili sipas dëshmisë së tij ka deklaruar se urdhrin e ka marrë nga Laert Haxhiu.
Dëshmia e Juxhin Kajdo
Kujtim Metën e njoh, është komshi, banor i lagjes “18 Nëntori” në Lushnje.
Atë ditë që ka ndodhur atentati ndaj Kujtimit isha në një lokal me vëllain. U fsheha poshtë makinës, ndërsa vëllai iku me vrap dhe u fsheh pas makinës. Më pas dëgjuam: ‘Ndihmë, ndihmë’.
Ka ndodhur para 2-3 vitesh, vitin fiks nuk e mbaj mend. Lokali ndodhej te stacioni i trenit në Lushnje. Pija kafen e mëngjesit aty dhe edhe pasdite. Kur ndodhi ngjarja ishte pasdite.
Lokali ndodhet te rrethrrotullimi, trotuari është rreth 3 metra e gjysmë dhe më pas ndodhet lokali. Shtator ose tetor sikur ka qenë. Kemi qenë ulur brenda. Nuk njoha askënd, pashë dikë me maskë dhe syze.
Në lokal ishin traktoristët, taksixhinjtë, pronari i lokalit, ndërsa të tjerët ishin ulur jashtë.
Ne ishim aty përpara dhe pas 10-15 minutash erdhi Kujtimi.
U ul vetëm, rreth dy tavolina më larg, afërsisht 2 metra e gjysmë larg nesh.
Unë kam qenë ulur në anën e djathtë të derës, ndërsa Kujtimin e kisha përballë. I thamë thjesht: ‘Ç’kemi’. U përshëndetëm.
E përjetuam shumë keq. Vëllai ka pasur trauma pas ngjarjes.
Pasi dëgjuam ‘Ndihmë’, e morëm bashkë me vëllain dhe pronarin e lokalit dhe e dërguam në spital.
Dorian Shurdhin e njoh, është banor i lagjes. Nuk jeton më. Artan Tafanin nuk e njoh.”
