Ministri i Jashtëm i Polonisë, Radoslaw Sikorski, deklaroi të mërkurën se Rusia mund të organizojë një provokim me flamur të rremë duke përdorur drone, ndoshta drone ukrainase dhe pastaj të pretendojë se po përgjigjet ndaj një sulmi, duke krijuar kështu një pretekst për veprim ushtarak kundër një vendi anëtar të NATO-s.
“Ajo që ata janë të aftë të bëjnë është një lloj provokimi me flamur të rremë duke përdorur drone ndoshta drone ukrainase dhe pastaj të pretendojnë se po përgjigjen ndaj sulmit tonë të rremë, që nuk ekziston”, tha Sikorski gjatë një debati në Bibliotekën dhe Muzeun Presidencial Ronald Reagan në Los Angeles, deklaratë e cila u raportua gjerësisht nga mediat polake.
Sipas Sikorskit, Rusia nuk ka burime për një sulm konvencional ndaj aleancës, por mund të përdorë një incident të inskenuar për të manipuluar opinionin publik dhe për të justifikuar një eskalim.“Ata luajnë lojëra të tilla. Ne duhet të jemi të përgatitur për këtë”, shtoi ai.
Ministri polak e ka ngritur disa herë mundësinë e një operacioni të tillë në ditët e fundit, në një kohë kur shqetësimi është rritur në Poloni dhe në vendet e tjera të krahut lindor të NATO-s për provokime të mundshme ruse dhe sulme hibride.
Paralajmërimi vjen ndërsa Polonia përballet me aktivitete të reja ushtarake ruse pranë kufijve të saj. Të martën, avionë luftarakë polakë ndërhynë për të interceptuar një avion rus të zbulimit Il-20 mbi ujërat ndërkombëtare të Detit Baltik, pasi ai u afrua deri në rreth 30 kilometra nga bregu polak pranë Ustka.
Polonia, që është një qendër logjistike kyçe për ndihmën ushtarake perëndimore për Ukrainën, e ka akuzuar vazhdimisht Rusinë për kryerjen e operacioneve hibride në territorin e saj, duke përfshirë sabotazhe, sulme kibernetike dhe fushata dezinformimi.
Varshava argumenton se këto aktivitete synojnë jo vetëm të dobësojnë drejtpërdrejt Poloninë, por edhe të minojnë mbështetjen publike për Ukrainën dhe të krijojnë përçarje brenda NATO-s.
Megjithatë, Sikorski ka theksuar se vazhdon të besojë në garancitë e sigurisë amerikane dhe se NATO është bërë më e fortë që nga fillimi i pushtimit në shkallë të plotë të Ukrainës nga Rusia.
