Kryeministri Edi Rama akuzohet se është lobim i Beogradit. Një akuzë të tillë për të e hodhi ish-deputeti i PD, Klevis Balliu. Ai postoi në “Facebook” një videomesazh, ku e vë theksin te zgjedhjet e 25 prillit dhe pretendimet e opozitës për vjedhjen e tyre.
Aty ai rikthyen në vëmendje edhe akuzat e bëra kundër qeverisë dhe kryeministrit në emisionin “Quo Vadis” në “Vizion Plus”, me moderatoren Pranvera Borakaj.
“Humbi shteti, fituan bandat. Këtu nuk ka patur zgjedhje, këtu ka patur krim. Një nga ngjarjet më të rënda që ka ndodhur në politikën shqiptare është mbledhja e 900 mijë të dhënave personale. Pushteti i Edi Ramës, lobim i Beogradit. Jemi përballë një konjukture të Beogradit, Edi Rama është lobim i Beogradit. Sic ishte marrëveshja e Edi Ramës me Vuçiçin për kufitë e Kosovës, nuk ishte e rastësishme. Nuk japin dorëheqjen ata që luftojnë krimin. Dorëheqjen ta japin ata që ndihmojnë krimin. Përsa kohë ka shqiptarë, ka demokratë. Përsa kohë ka demokratë, ka luftë për demokraci. Bashkë drejt fitores së kombit shqiptar”, thuhet në videomesazh.
