Detaje të reja kanë dalë në dritë lidhur me ngjarjen e rëndë të regjistruar në fshatin Arst, ku një çift bashkëshortësh, Bardhe dhe Skënder Nika, 51 dhe 55 vjeç, u dhunuan nga persona ende të paidentifikuar.
Nga spitali, Skënder Nika ka treguar se sulmi ndodhi teksa po kthehej nga puna në HEC. Sipas tij, pesë persona të maskuar i kanë dalë përpara duke u prezantuar si policë.
Lexo edhe :
Related Posts
“Isha duke u kthyer nga puna nga HEC-i. Më kanë dalë pesë persona përpara dhe më thanë ‘ndal, Policia’. Kam ndaluar. Ishin me maska dhe me rroba të ngjashme me ato të RENEA-s. Njëri kishte automatik, ndërsa të tjerët shkopinj gome. Nuk di çfarë ka ndodhur më pas, vetëm më kanë qëlluar. Mbaj mend që më kanë thënë një herë ‘mos bërtit’. Pastaj ka dalë gruaja dhe e kanë rrahur edhe atë”, është shprehur ai.
Nika ka deklaruar se dyshon se ngjarja mund të ketë lidhje me një konflikt të mëparshëm me një familje të zonës.
“Para katër ditësh kam pasur një konflikt me një familje në fshat për dredhëza. Me të njëjtët kam pasur probleme edhe katër vite më parë. Më kanë akuzuar se kam spiunuar. Kam kërkuar t’u betohem dhe u kam shpjeguar se nuk kam paditur apo spiunuar askënd, por nuk kanë pranuar. I vetmi konflikt që kam është ky”, ka thënë ai.
Ndërkohë, autoritetet vijojnë hetimet për zbardhjen e plotë të ngjarjes, identifikimin e autorëve dhe sqarimin e motiveve të sulmit.
