Kanë vijuar edhe këtë të mërkurë operacionet e kërkim-shpëtimit për gjetjen e trupit të 37-vjeçarit Armando Zajsi, i cili humbi jetën pasditen e së hënës në ujërat e Liqenit të Ulzës.
Në operacion janë angazhuar palombarët e RENEA, Forcave Speciale Detare dhe Forcat e Armatosura të Republikës së Shqipërisë, të cilët kanë vijuar krehjen e zonës ku 37-vjeçari dyshohet se u mbyt pasi u rrëzua nga një mjet lundrues tip Jet Ski.
Pavarësisht përpjekjeve intensive, deri më tani kërkimet nuk kanë dhënë rezultat. Burime nga operacioni bëjnë me dije se në ndihmë të kërkimeve pritet të angazhohet edhe një dron nënujor i sjellë nga Forcat Detare të Vlorës, me qëllim lokalizimin e trupit në thellësitë e liqenit.
Armando Zajsi kishte shkuar në Ulëz së bashku me një grup miqsh dhe kishte hyrë në ujë për të lundruar me Jet Ski. Në një moment ai është rrëzuar nga mjeti dhe ka përfunduar në ujë.
Dëshmitarët tregojnë se 37-vjeçari ka notuar për disa metra në përpjekje për t’u rikthyer te mjeti lundrues, por më pas është zhytur dhe nuk është parë më.
Miqtë e tij kanë tentuar t’i vijnë në ndihmë, por kur kanë mbërritur pranë Jet Ski-së, 37-vjeçari kishte humbur në thellësinë e ujit.
Sipas ekspertëve, gjetja e trupit të 37-vjeçarit është një operacion i vështirë për shkak se thellësia arrin deri në 40 metra dhe është shumë afër digës së hidrocentralit të Ulzës.
