Athinë – Autoritetet greke kanë goditur një organizatë kriminale që merrej me trafikun e kokainës në Atikë, duke arrestuar nëntë persona gjatë një operacioni të zhvilluar mëngjesin e së mërkurës.
Sipas policisë, të arrestuarit janë të moshave 24 deri në 49 vjeç dhe akuzohen për krijim dhe pjesëmarrje në organizatë kriminale, trafik narkotikësh, pastrim parash të ardhura nga veprimtari kriminale, shkelje të ligjit për armët dhe falsifikim dokumentesh.
Policia gjithashtu ka shpallur në kërkim pesë persona, të cilët dyshohet se janë pjesë e grupit.
Si vepronte organizata
Hetimet kanë zbuluar se grupi kishte një strukturë të organizuar hierarkike, me një drejtues dhe tre zëvendësdrejtues. Organizata dyshohet se vepronte të paktën që nga dhjetori i vitit 2025.
Lideri i grupit, një 39-vjeçar me origjinë shqiptare, kishte kontroll të plotë mbi aktivitetet e organizatës, duke përcaktuar strategjinë dhe duke dhënë urdhra për shpërndarjen e lëndëve narkotike. Tre bashkëpunëtorët e tij mbikëqyrnin pjesën tjetër të anëtarëve, të cilët merrnin sasi kokaine për t’i shitur te klientët.
Për të shmangur zbulimin nga policia, anëtarët përdornin aplikacione të koduara komunikimi dhe ndërronin shpesh numrat telefonikë.
Gjatë kontrolleve në banesa dhe ambiente të përdorura si depo të organizatës, policia sekuestroi:
- 827.1 gramë kokainë;
- një sasi të vogël kanabisi;
- 3 pistoleta;
- një karikator arme ushtarake;
- 119 fishekë;
- telefona celularë të përdorur për aktivitetin kriminal;
- 5 automjete;
- 14.505 euro dhe 470 dollarë amerikanë;
- 3 radio-komunikues;
- 7 peshore elektronike precize;
- një shkop bejsbolli, sprej piperi dhe 3 thika.
Fitime të paligjshme mbi 900 mijë euro
Sipas vlerësimeve të autoriteteve, përfitimi i paligjshëm nga aktiviteti kriminal i organizatës kalon vlerën e 900 mijë eurove.
Të arrestuarit janë dërguar para prokurorit kompetent, ndërsa hetimet për identifikimin e personave të tjerë të përfshirë vijojnë.
