Mungesa e deputetes Marjana Koçeku në mbledhjen e Komisionit për Politikën e Jashtme nuk e la jashtë vëmendjes çështjen e deklaratave të saj lidhur me kërcënimet që pretendon se ka marrë nga grupi kriminal i Bajrave. Tema u ngrit gjatë mbledhjes nga deputetja e opozitës Albana Vokshi, e cila kërkoi reagim institucional për rastin.
Për herë të parë nga mazhoranca reagoi kryetari i Komisionit, Igli Hasani, i cili theksoi se çdo person që ndihet i kërcënuar duhet t’u drejtohet menjëherë organeve ligjzbatuese.
“Zonja Vokshi, të gjithë deputetët e këtij Parlamenti kanë ardhur përmes votës së lirë. Këtu nuk ka përfaqësues të krimit. Rezultatet kanë qenë të qarta dhe procesi ka qenë transparent. Kushdo që ndihet e kërcënuar, kushdo që ka indicie duhet t’i drejtohet organeve, Policisë së Shtetit, menjëherë nëse ka qoftë edhe një kërcënim të çfarëdolloj përmase. Se kush zgjedh Instagramin për të bërë deklarata, kjo nuk është puna ime fare. Është shumë e rëndësishme t’i drejtohen organeve në mënyrat më të shpejta dhe më efikase për të garantuar atë që kemi vite që e garantojmë, shtetin e së drejtës”, deklaroi Hasani.
/vizionplus.tv
