Policia e Sarandës, ka ndaluar mbrëmjen e djeshme tre të rinj, të cilët qarkullonin të armatosur me pistoletë dhe municion luftarak, në një automjet luksoz.
Por në momentin e ndalimit, njëri prej tyre tentoi të arratisej duke u hedhur në det së bashku me çantën ku ndodhej arma.
Policia ka sekuestruar armën e zjarrit pistoletë, 16 fishekë dhe automjeti tip “Porsche” me të cilin lëviznin të rinjtë.
“Në lagjen nr. 1, rruga “Butrinti”, Sarandë, u ndalua për kontroll automjeti luksoz tip “Porsche”, me të cilin udhëtonin 3 shtetas. Gjatë veprimeve, njëri prej tyre, shtetasi E. D., tentoi të largohej duke u hedhur në det, së bashku me çantën ku ndodhej arma e zjarrit, me qëllim humbjen e provave. Por falë reagimit të shpejtë të punonjësve të Policisë, me mbështetjen e Policisë Kufitare që ndodhej në patrullim në afërsi me mjetin e tyre lundrues, u bë e mundur kapja në flagrancë e këtij shtetasi”, njofton policia.
Gjithashtu, nga punonjësit e Policisë Sarandë u bë e mundur, gjetja e çantës me armën që ky shtetas tentoi të fshihte duke e hedhur në det.
Tre të rinjtë u vunë në pranga.
Në vijim të veprimeve procedurale, specialistët për Hetimin e Krimeve në Komisariatin e Policisë Sarandë arrestuan në flagrancë shtetasit:
E.D., 27 vjeç, banues në Kamëz, për veprat penale “Armëmbajtja pa leje” dhe “Kundërshtimi i punonjësit të policisë së rendit publik”;
I.G., 21 vjeç, banues në Kamëz, për veprat penale “Mos kallëzimi i krimit” dhe “Veprime që pengojnë zbulimin e së vërtetës”;
B.C., 27 vjeç, banues në Kamëz, për veprat penale “Mos kallëzimi i krimit” dhe “Veprime që pengojnë zbulimin e së vërtetës”, i cili rezultoi edhe person i shpallur në kërkim për veprat penale “Sigurimi i kushteve dhe i mjeteve materiale për të kryer vrasje” dhe “Mbajtja pa leje dhe prodhimi i armëve luftarake”./vizionplus.tv
