Kreu i Partisë Demokratike Sali Berisha ka zhvilluar mbledhje me grupin parlamentar në selinë blu.
Gjatë fjalës së tij, Berisha u shpreh se vendi sot ndodhet në monizëm, ndërsa sipas tij institucioni më i prekur është Parlamenti, ku e drejta e fjalës së deputetëve është dhunuar.
Kryedemokrati shton më tej se me urdhër të Edi Ramës, shumë deputetë të opozitës janë përjashtuar nga seanca plenare.
“Theksoj se në parimin tonë, aty ku është shtypja, aty do të jetë qëndresa, aty do të jetë fitorja. Ne nisëm një revolucion i cili ka për objektiv madhor, përmbysjen e monizmit të bazuar në krimin, drogën dhe vjedhjen e shqiptarëve, rikthimin e të drejtës së votës së lirë të këtyre qytetarëve si objektivat më madhorë të tij.
Në kushtet e monizmit të plotë një nga institucionet më të goditura është parlamenti. Libri themelor i çdo kombi të qytetëruar që është kushtetuta shkelmohet në parlament, dhunohet në parlament. Deputetët e opozitës në parlament janë trajtuar në mënyrën më antikushtetuese.
Të drejtat e tyre janë dhunuar, janë pjesëtuar si kurrë ndonjëherë më parë në historinë e parlamentit. Për të drejtën e fjalës deputetët janë përjashtuar nga parlamenti, të tjerë në kundërshtim me çdo ligj dhe rregull shpallen të përjashtuar nga grupi me urdhër të Edi Ramës”, tha Berisha.
Sipas kryedemokratit, deputetët përfaqësojnë 750 mijë qytetarët që i kanë votëbesuar.
Berisha thotë se revolucioni i tyre do të shtrihet në të gjithë territorin e vendit.
“Por deputetët e opozitës nuk përfaqësojnë vetëm veten e tyre, por 750 mijë votues të cilët në zgjedhjet e fundit votuan për forcat opozitare. Të injorosh në këtë mënyrë 750 mijë votues, të sillesh me këtë brutalitet, dhe këtë armiqësi të egër ndaj tyre nuk bën gjë tjetër veç se kërkon konfliktin e hapur.
Në këto kushte ne nisëm revolucionin tonë, për ta vazhduar atë në të katër anët e vendit gjer në triumfin e tij. Nuk ka dyshim që parlamenti është një epiqendër jashtëzakonisht e rëndësishme”, tha Berisha.
