Aktivisti Shpend Gashi, i ftuar këtë të enjte në emisionin Quo Vadis të moderatores Pranvera Borakaj në Vizion Plus, ka folur për protestën qytetare, e cila ishte në ditën e pestë sot.
Gashi tha se po zhvillohet një protestë model dhe se vetë protestuesit po kujdesen të mbajnë larg policisë ata që duan të dëmtojnë revoltën.
I pyetur nga moderatorja Pranvera Borakaj nëse u provokuan kur policia hodhi ujë një ditë më parë, Gashi tha se ai ujë ishte një bekim.
Ai ftoi qytetarët të tregohen të duruar dhe t’i bashkohen protestës.
Pjesë nga biseda:
Borakaj: Si t’u duk dita e pestë?
Gashi: Me super energji. Na motivon llumi që hidhet ndaj nesh, ishalla u shtohet inati. Ka një lloj sinergjie që i pamundëson organizatorët. Ne jemi disa mirëmbajtës.
Borakaj: Kush janë?
Gashi: Ne, qytetarët e thjeshtë. Vijnë të gjithë dhe thonë: na ndajnë shumë gjëra, por po na humbasin dinjitetin këta. Si i ndajmë ne? Unë kam dobësi për Policinë e Shtetit. Prandaj unë dhe miqtë e mi bëjmë një kordon që të mos preket policia.
Borakaj: A ka aty provokime?
Gashi: Po, sigurisht që ka. Vjen njëri aty dhe thotë: “Hiq kapelen”, dhe shan. Unë kam një respekt të ndërsjellë me kordonin e policisë. Ne protestojmë, ata na ruajnë të drejtat tona qytetare. Nëse preket një polic, ajo prishet.
Borakaj: Nuk u shqetësuat dje për ujin që u hodh ndaj protestuesve?
Gashi: Uji që u hodh dje ishte dhurata më e madhe që na bënë. Ata u thyen, e hapën rrugën. Unë isha vetë dje, asnjë polic nuk ishte për grusht.
Borakaj: Kush është kërkesa kryesore?
Gashi: Nuk ka asnjë kërkesë kryesore. Ajo protestë ka shumë kërkesa: për banorët e 5 Majit, për Astirin, për atë xhaxhain që u dogj, për pronën time, për doktoraturën time, për një djalë të vdekur.
Borakaj: Për 35 vite problematike.
Gashi: Po.
Borakaj: Si do të konkretizohet?
Gashi: Po më thua se njerëzit nuk janë lodhur për 35 vite me Ramën dhe Berishën dhe do të lodhen me ne? Po presim ne që të shkojnë vetë Rama dhe Berisha në burg? Unë nuk mbaj peshë; fati do të na tregojë se kush do t’i marrë frenat.
Borakaj: Ka lider në protestë?
Gashi: Jo, asnjë lloj lideri. U them njerëzve: kur duruan 45 vite Enverin, 35 vite Ramën dhe Berishën, na prisni disa ditë edhe neve sa të kthjellohemi.
