Kur duhen vetëm pak ditë nga votimet e ndërmjetme për Kongresin në Shtetet e Bashkuara, presidenti Biden tha se demokracia amerikane ndodhet në rrezik.
Sipas tij, demokracia më e madhe në botë rrezikon të rrëshqasë në kaos, si pasojë e gënjeshtrave të përhapura nga paraardhësi i tij, Donald Trump.
JOE BIDEN
PRESIDENTI I SHBA
Pretendimet për zgjedhje të manipuluara kanë ushqyer rritjen e rrezikshme të dhunës politike dhe frikësimit të votuesve gjatë dy viteve të fundit. Sot ka kandidatë që konkurrojnë për çdo nivel posti në Amerikë, por ka nga ata që nuk premtojnë të pranojnë rezultatet e zgjedhjeve ku ata marrin pjesë. Kjo është rruga drejt kaosit në Amerikë. Është e paprecedentë, është e paligjshme. Dhe, është joamerikane.
Biden u nis nga sulmi ndaj bashkëshortit të Kryetares së Dhomës së Përfaqësuesve Nensi Pelosi. Për këtë, ai fajësoi pretendimet e Trump për zgjedhje të manipuluara, të cilat kulmuan me sulmin e 6 janarit 2021 në Kapitol.
Presidenti Biden kërkoi nga zgjedhësit që të tregojnë maturi dhe pjekuri në zgjedhjen që do të bëjnë. Sipas tij, votuesit nuk duhet të mbështesin kandidatë që nuk pranojnë humbjen, pasi kjo mund ta dërgojë vendin në një situatë të rrezikshme.
Dy vitet e fundit, Shtetet e Bashkuara janë përballur me sfidën e mospranimit të rezultatit të zgjedhjeve presidenciale. Mbështetësit e ish-presidentit Trump besojnë se ato janë manipuluar.
