Klubi Vllaznia ka marrë një vendim ekstrem për të mbyllur tribunat ku ishin parashikuar të qëndronin tifozet e Tiranës për klasiken e futbollit shqiptar që luhet ditën e sotme.
Vendimi sipas njoftimit të klubit është marrë pasi tifogrupi “Tirona Fanatics” ka postuar në faqen e vet në facebook mesazhe që nxisin dhunë, dhe ndonëse është lajmëruar FSHF, nuk ka pasur asnjë distancim dhe tërheqje nga këto postime dhe mesazhe.
Klubi i Futbollit Vllaznia është i angazhuar maksimalisht në organizimin sa më të mirë të ndeshjes Vllaznia-Tirana duke u kujdesur maksimalisht për një qëndrim korrekt të tifozërive respektive në shkallët e stadiumit. Konstatohet se grupimi “Tirona Fanatics” përmes faqes së tij zyrtare, në njoftimin dhe përgatitjen e tifozërisë tiranase për të marrë pjesë në këtë takim, ka lëshuar fyerje të cilat nxisin dhunë dhe janë të papranueshme për principet dhe misionin e futbollit. Përsa më sipër, ditën e djeshme kemi njoftuar Federaten Shqiptare të Futbollit dhe Klubin e Futbollit Tirana për marrjen e masave të menjëhershme dhe heqjen e fjalëve të papërshtatshme në postimin e këtij grupimi. Por, përtej angazhimit dhe mirëkuptimit të FSHF-së dhe Klubit Tirana, deri sot në mesditë nuk ka patur asnjë reagim duke mbetur e njëjta situatë. Përsa më sipër, KF Vllaznia me qëllim parandalimin e përshkallëzimit të situatave të dhunës, do të mbajë të mbyllura tribunat E4 dhe E5 të planifikuara për grupimin e tifozave të Tiranës.
Ju falenderojmë për mirëkuptimin!
