Skuadra e shpresave e drejtuar nga Alban Bushi nuk do të zbresë në fushë këtë të enjte përballë 21-vjeçarëve të Sllovenisë. Lajmin e ka bërë të ditur Federata e Futbollit, e cila shpjegoi arsyet pse ky takim nuk mund të zhvillohet.
Shkak është bërë infektimi i disa lojtarëve të Sllovenisë me koronavirus. Në këtë situatë, pas konsultimit të dy federatave u vendos që skuadra sllovene të mos udhëtojë drejt Shqipërisë për miqësoren, si masë paraprake për të ruajtur shëndetin e lojtarëve.
Por pas anulimit të kësaj sfide, tekniku Alban Bushi ka programuar dhe dy miqësore të tjera, më datë 8 tetor përballë Apolonisë në stadiumin “Elbasan Arena” dhe dy ditë më vonë ndaj Tiranës në “Selman Stërmasi”.
