Kryeministri Edi Rama po zhvillon këtë të premte një bashkëbisedim me banorët në Zvërnec.
Gjatë fjalës së tij, Rama tha se projekti nuk ka ardhur papritur, por ka qenë pjesë e vizionit të qeverisë, të cilën sipas tij e ka theksuar edhe gjatë fushatës.
Kryeministri solli shembullin e Tivatit në Mal të Zi, i cili sipas tij dikur ishte një nga zonat më të pazhvilluara të vendit fqinj, ndërsa sot është kthyer në një nga destinacionet më të rëndësishme turistike dhe kontribuuesin më të madh në të ardhurat nga taksat.
Kryeministri kundërshtoi gjithashtu pretendimet se investime të tilla favorizojnë vetëm investitorët e huaj, duke argumentuar se përfitimet shpërndahen në të gjithë zinxhirin ekonomik.
Sipas Ramës, ndikimi ekonomik i një resorti shkon përtej investimit fillestar.
Rama: Janë 800 mijë njerëz që kanë bërë marrëveshje me mua. Ky investim s’ka dalë papritur. Unë e kam thënë edhe në fushatë, do ta bëjmë këtë me investim privat. Unë isha në Tivat. Tivati ka qenë më i pazhvilluari i Malit të Zi dhe ku nuk shkonin turistë. As turistë, as dreq, as shejtan. Ikte e gjithë rinia nga Tivati dhe fati që në fakt duhet ta kapte Shqipërinë. Se një investitor i madh kanadez erdhi në Shqipëri dhe ka ardhur në periudhën që ne ishim në pozitë. I kërkuam pjesën dhe ai u pataks. Donte të bënte portin turistik në Durrës. Shkoi në Mal të Zi. E mori direkt ai tjetri. Sot Tivati ka 5 milionë turistë në vit, por nuk është këtu puna. Tivati është zona që kontribuon më shumë me taksa në gjithë Malin e Zi. Nuk blen dot dikush në Tivat kollaj, por për banorët që janë aty, po të duan të shesin… E dini sa janë të ardhurat që marrin nga të gjitha taksat?
Atje bëjnë fat fermerët shqiptarë nga ana tjetër e kufirit, sepse kanë kontrata. Se atje s’ka shumë prodhim. Kjo teoria që do na vijnë të huajt, po patjetër që do vijnë. Po pse, 12 milionë turistë që vijnë për pushime, ku i çojnë ato para? Do hanë ata? Çfarë do hanë? Do hanë çfarë prodhohet këtu. Marrin taksi, furgonat, presin bileta nëpër vendet arkeologjike. Një euro që futet në një resort, është 1.6-2 euro që hyjnë në komunitet. Fati i madh i të gjitha investimeve është fati i gjithë komunitetit.
/vizionplus.tv
