Kryeministri Edi Rama, duke folur në qytetin e Vlorës me rastin e 35-vjetorit të themelimit të PS-së, u ndal edhe te investimi në Zvërnec, i cili është bërë shkak për protesta në të gjithë vendin.
Rama, duke sjellë shembullin e investimeve që janë bërë në Tivat të Malit të Zi, tha se krahasuar me atë, Vlora do të jetë shumë më lart.
Sipas tij, investimi që do të bëhet në Zvërnec nuk do të sjellë të mira dhe rritje ekonomike vetëm në Vlorë, por në të gjithë Shqipërinë.
“Sot erdha këtu drejtpërdrejt nga Tivati. Gjatë kohës që kam qenë atje, kam menduar se si e ndryshon rrugën e një vendi të tërë një moment dhe se si një sjellje e gabuar e atyre që vendosin mund të spostojë rrugën e të ardhmes nga një vend në një vend tjetër.
Ishte hera e parë që shkoja në atë vend. Njerëz të familjes time kanë shkuar, më kanë ftuar të shkoja, por gjithmonë kam refuzuar. Refuzoja të shkoja që të mos përjetoja atë që përjetova dje dhe sot.
Tivati është një vend i bukur, por si Tivati, edhe Vlora ka çdo gjë të saj. Përpara se Tivati, që ishte një qytetzë me 10 mijë banorë, ku nuk shkonin turistë sepse ishte një bazë ushtarake dhe të gjithë e konsideronin si një bregdet të nivelit të ulët, erdhën në Shqipëri ata që e transformuan Tivatin në një vend që sot ka 5 milionë turistë në vit.
Përfytyroni një vend me 10 mijë banorë, i braktisur nga shpresa e të ardhmes, që papritur pret 5 milionë turistë.
Erdhën në Shqipëri diku nga viti 2009 dhe gjetën këtu derën të mbyllur. Donin të bënin portin turistik të Durrësit një burrë nga Kanadaja, i cili u largua më pas, u detyrua të largohej. Një burrë këmbëngulës që donte ta bënte në Durrës investimin e tij, sepse ishte i bindur se duke bashkuar portin me amfiteatrin do të transformonte Shqipërinë. Nuk e bëri dot në Shqipëri, e bëri në Tivat.
Në atë vend, në zonën rreth portit, vlera e pronës nga 400 euro për metër katror është 12 mijë euro për metër katror. Vlera e pronës në qytet dhe në rrethina është 4 mijë euro.
Natyrisht, Tivati është burimi më i madh i të ardhurave të shtetit në Malin e Zi. Mali i Zi prej vitesh, edhe pse vendi më i vogël në Ballkan, është vendi me pagat më të larta me shumë diferencë nga ne dhe nga të tjerët.
Si ka mundësi që disa të huaj që erdhën në Malin e Zi ndërtuan portin dhe një sërë hotelesh, ndërtuan turizmin e pasur, ndërsa Shqipëria, që ka bukuri të jashtëzakonshme, nuk ka arritur të njëjtin nivel?
Llogaria është shumë e thjeshtë: nëse 100 turistë vijnë dhe lënë në ditë 30 euro, bëjnë 3 mijë euro. Nëse 10 turistë vijnë dhe lënë 3 mijë euro në ditë, bëjnë 30 mijë euro.
Nëse 12 milionë turistë që vijnë në Shqipëri sjellin 5 miliardë euro, imagjinoni se sa do të sillnin jo 12 milionë, por edhe shumë më pak, nëse do të kishim struktura më të forta turistike.
Prandaj pyetja “çfarë ka këtu për mua?” është e gabuar në thelb. Nuk shkohet në një resort vetëm për veten; aty hyjnë të huajt dhe investimet.
Asnjë vend që bukurinë e vet e ka vënë në shërbim të turizmit masiv nuk ka mbetur në prapambetje. Turqia e bëri ndryshimin e madh jo vetëm kur hapi turizmin, por kur futi hotelet, resortet, marinat dhe jahtet.
Natyrisht, njerëzit e zakonshëm nuk mund të hyjnë në një jaht, por jahti hyn në ekonominë e tyre.
Përfytyroni që një investim në Mal të Zi ishte 150 milionë euro dhe më pas u shit për 700 milionë euro. Tani, një investim prej 4 miliardë eurosh në një zonë të Vlorës, mendoni vetë çfarë prodhon.
Sipas të gjitha studimeve, 1 euro që hyn në një resort gjeneron 2 euro në ekonominë përreth tij. Ai investim, nëse realizohet, do të jetë bekimi më i madh për të gjithë Shqipërinë.
Ai investim nuk do të ndërtojë vetëm hotele, por do të sjellë një vlerë të shumëfishuar jashtë kufijve të tij,” tha Rama.
