Ish-kryetari i Gjykatës së Vlorës, Skënder Haluci, është ndarë nga jeta në moshën 64-vjeçare.
Haluci ndodhej prej disa ditësh në Bjeshkët e Tropojës, ku kishte shkuar për të pushuar së bashku me familjen. Sipas të dhënave paraprake, mëngjesin e sotëm ai u ka thënë familjarëve se nuk ndihej mirë, ndërsa pak minuta më vonë është gjetur pa shenja jete.
Lajmi për ndarjen e tij nga jeta është bërë i ditur edhe përmes rrjeteve sociale nga familjarë dhe miq të Halucit, të cilët kanë shprehur dhimbjen për humbjen e papritur.
Rrethanat e sakta të ngjarjes dhe shkaku i vdekjes pritet të përcaktohen nga ekspertiza mjekoligjore dhe autoritetet përkatëse.
Një karrierë mbi 25-vjeçare në drejtësi
Skënder Haluci ishte një emër i njohur i sistemit të drejtësisë shqiptare. Ai përfundoi studimet e larta në Universitetin e Tiranës në vitin 1995 dhe e nisi karrierën si gjyqtar më 23 gusht 1996, në Gjykatën e Rrethit Gjyqësor Tiranë.
Pas rreth 15 vitesh në gjykatat e Tiranës, në nëntor 2011 u emërua gjyqtar në Gjykatën e Rrethit Gjyqësor Vlorë. Në vitin 2013 u komandua në detyrën e kryetarit të kësaj gjykate, ndërsa një vit më vonë u emërua zyrtarisht në këtë funksion, të cilin e mbajti deri në mars 2020.
Karriera e tij në sistemin gjyqësor u ndërpre pas procesit të vettingug. Më 5 mars 2020, Komisioni i Pavarur i Kualifikimit vendosi shkarkimin e tij nga detyra.
Vendimi u ankimua në Kolegjin e Posaçëm të Apelimit, i cili më 27 tetor 2022 vendosi të lërë në fuqi vendimin e KPK-së, duke i dhënë fund përfundimisht karrierës së tij në sistemin e drejtësisë.
