Mbrëmja e sotme do të mbetet e shkruar me shkronja të arta në historinë e futbollit shqiptar.
Në një përballje dramatike dhe plot emocione, Egnatia ka arritur një përmbysje spektakolare në shtëpi përballe irlandezëve të Shamrock Rovers, duke fituar me rezultatin e thellë 5-1 (rezultati i përgjithshëm 6-4) dhe duke siguruar kështu për herë të parë kalimin në fazën e ligës të një kompeticioni europian.
Edhe pse ekipi i Nevil Dedes mbeti me 10 lojtarë pas përjashtimit të Ndrecës në fundin e pjesës së parë, rrogozhinasit nuk u dorëzuan dhe vijuan dominimin edhe në pjesën e dytë.
Miqtë reaguan duke gjetur njëherë rrjetën me anë të Burkes në minutën e 74’, gol që vlejti vetëm për statistikë.
Kualifikimi në play-off-in e Europa League do të thotë se Egnatia e ka të sigurt matematikisht pjesëmarrjen në fazën e ligës së Conference League, duke garantuar një arritje historike për klubin dhe futbollin shqiptar.
Rregulloret e UEFA-s parashikojnë se ekipet që humbin në play-off-in e Europa League vazhdojnë në fazën e ligës së Conference League.
Egnatia tashmë ëndërron edhe më shumë: një tjetër përballje për të siguruar një vend në fazën e ligës së Europa League, teksa në play off do të ndeshet me norvegjezët e Lillestrom.
