Një takim i mundshëm mes presidentit ukrainas Volodymyr Zelensky dhe homologut të tij rus Vladimir Putin mund të zhvillohet në Turqi. Deklarata u bë nga ministri i Jashtëm ukrainas, Andrii Sybiha, gjatë një konference të përbashkët me ministrin e Jashtëm turk, Hakan Fidan.
Sybiha tha se Ukraina është e gatshme për një armëpushim dhe se një takim në nivel liderësh mund t’i japë një shtysë të re procesit të paqes.
“Ne deklarojmë se negociatat, veçanërisht një takim i mundshëm midis Presidentit Zelenskyy dhe Putin, mund të zhvillohen në Turqi. Unë besoj se vetëm një samit udhëheqësish mund të sjellë një vrull të ri në procesin e paqes. Si Ukrainë, ne jemi gati për një armëpushim”, tha Sybiha.
Presidenti turk Recep Tayyip Erdogan u ka bërë më herët disa herë ftesë dy liderëve për t’u takuar në Turqi, vend i cili ka pritur edhe raunde të mëparshme negociatash mes delegacioneve të Kievit dhe Moskës.
Ministri i Jashtëm turk, Hakan Fidan, tha se vijimi i bisedimeve të zhvilluara në Stamboll do të ishte i dobishëm për përpjekjet diplomatike.
“Unë besoj se do të ishte shumë e dobishme që bisedimet e Stambollit të ndërmjetësuara nga Turqia mbi luftën Rusi-Ukrainë të vazhdonin nën të njëjtin kuadër. Fakti që lufta po vazhdon nuk do të thotë që negociatat në këtë format nuk mund të vazhdojnë”, u shpreh Fidan.
Fidan theksoi gjithashtu se Turqia kërkon të shmangë përhapjen e konfliktit në Detin e Zi, duke e cilësuar të papranueshme goditjen e porteve, cisternave dhe anijeve të peshkimit në këtë zonë.
Sipas ministrit turk, një marrëveshje e mundshme paqeje duhet të përfshijë garanci sigurie për Ukrainën në ajër, det dhe tokë. Ai shtoi se Turqia ka rënë dakord të udhëheqë komponentin detar të këtyre përpjekjeve.
“Turqia ka rënë dakord të udhëheqë komponentin detar dhe ne kemi një mirëkuptim të përbashkët për këtë me aleatët tanë. Përpjekje planifikimi për këtë çështje po kryhen edhe nga forcat detare të vendeve përkatëse aleate”, deklaroi Fidan.
Ndërkohë, lufta mes Rusisë dhe Ukrainës vijon të jetë e tensionuar, ndërsa zhvillimet e fundit në Detin e Zi kanë shtuar shqetësimet për sigurinë në rajon.
/vizionplus.tv
