Arkitektë nga e gjithë bota, u mblodhën në Tiranë në edicionin e dytë të Festivalit “Bread&Heart”.
Tema e eventit, “Peizazhe të Bollëkut”, e vendos fokusin nga ndërtesat e izoluara, te hapësirat midis tyre: peizazhet, ekologjitë, infrastrukturat dhe sistemet e gjalla që formësojnë Shqipërinë.
Gjatë fjalës hapëse, Kryeministri Rama i cilësoi arkitektët si “foshnjet e preferuara të zotit” pasi vizioni i tyre ndërtoi hapësirat në të cilat ne jetojmë.
“Mendoj që e kam thënë ç‘kam pasur e ç‘kam për të thënë dhe ju e dini besimin që kam unë tek arkitektura, tek bindja që arkitektët janë “foshnjat e privilegjuara të Zotit” dhe të vetmit mes njerëzimit që iu është dhënë nga Zoti mundësia të “luajnë” Perëndinë, sepse të gjithë të tjerët kanë nevojë për arkitektët që të jetojnë jetët e tyre e që të ndërtojnë botën e tyre”, tha Rama.
Për kreun e qeverisë, ruajtja e natyrës duhet të jetë në fokus të çdo projekti.
“Ruajtja e natyrës mund të ketë të bëjë dhe duhet të ketë të bëjë edhe me zhvillimin, në harmoni me natyrën. Jo për ta vendosur natyrën në shërbim të njerëzve, por edhe për t’i vendosur njerëzit në shërbim të natyrës. Të mos u themi që ‘’nëse doni të jetoni me natyrën, nëqoftëse doni të jetoni në peizazhe tëndryshme, duhet të largoheni në mbrëmje, sepse mund t’ju hanë ujqërit’’. Jo. Mund edhe të flini aty në mbrëmje, mund të zgjoheni po kështu në mëngjes e të punoni aty. Mund të ftoni njerëz aty”, tha Rama.
Ky festival, i jep studiove arkitekturore mundësinë që të prezantojnë projektet e tyre si dhe ide se si mund të modernizohen ndërtesa apo zona të cilat janë jo funksionale. Kjo i jep dhe qeverisë mundësinë për të hapur më pas konkurse për sjelljen në jetë të këtyre ideve.
