Rolando Maran e ka nisur me humbje aventurën e tij në krye të stolit të kobmbëtares Shqiptare. Kuqezinjtë janë mposhtur me rezultatin 1-0 në miqësoren e sotme përballë Izraelit në “Air Albania”.
Një ndeshje e cila pati pak interes nga ana e tifozërisë, ku shkallët e stadiumit nuk ishin si në ndeshjet e tjera, ku jemi mësuar të shohim kuqezinjtë.
Sfida nisi me tension, pasi himni izraelit u prit me vërshëllima nga ana e tifozëve të pranishëm në stadium.
Në këtë sfidë, Rolando Maran hodhi që nga minuta e parë në fushë Anis Mehmetin, i cili luajti në sulm krah Armando Brojës, ndërsa pas tyre luajti në pozicionin e trekuartistit Qazim Laçi.
Ndryshime pati edhe në portë, ku Alen Sherri luajti titullar, ndërsa në mbrojtje ishte rreshtimi i zakonshëm, në të majtë Mario Mitaj, në të djathtë Elseid Hysaj, ndërsa në qendër ishin Arlind Ajeti dhe Berat Gjimshiti.
Në mesfushë luajtën Arbër Hoxha, Kristjan Asllani dhe Ylber Ramadani.
Gjatë pjesës së parë, kuqezinjtë krijuan volum loje, por asnjë rast të pastër për shënim. E njëjta gjë ndodhi edhe në pjesën e dytë.
Në fraksionin e dytë të lojës, Maran hodhi në fushë edhe Nedim Bajramin, Dakun, Shehun, Shendin, Hadrojin dhe Pajazitin dhe për herë të parë Luis Hasën, por pa mundur të ndryshonin rrjedhën e takimit.
Goli për miqtë u shënua nga Gloukh në minutën e 73-të.
