Eksperti zgjedhor Andon Kume ishte i ftuar këtë të enjte në studion e QUO VADIS në Vizion Plus.
Kume tha se është utopike të pritet një pavarësi e plotë e gjyqësorit në një vend me përmasa dhe realitet institucional si Shqipëria.
Ai e krahasoi vendin me Italinë, duke theksuar se diferencat historike dhe institucionale janë të mëdha.
Kume ngriti gjithashtu dyshime mbi mënyrën se si funksionojnë disa procese hetimore në Shqipëri, duke sugjeruar se ato mund të mos burojnë vetëm nga iniciativa e brendshme e institucioneve të drejtësisë.
Kume: Është shumë utopike që ne të mendojmë që në një vend si Shqipëria, kaq i vogël sa ç’jemi ne dhe me kaq banorë, drejtësia të jetë realisht e pavarur. Nuk mund ta krahasosh dot Shqipërinë me Italinë, e cila ka 60 milionë banorë, ndërkohë që ne jemi sa një lagje e saj me rreth 2 deri në 2.5 milionë banorë. Në Itali, në vitet 1990-92 kur u bë “maksi procesi” që mori përpara një klasë të tërë politike, pavarësia e gjyqësorit nuk ishte ndërtuar për pesë vite. Unë kam studuar vetë në Itali dhe një temë studimore që kam trajtuar ka qenë pavarësia e gjyqësorit në vitet 1850 deri në 1900, pra atje flitej për pavarësinë e gjyqësorit dy shekuj përpara. Ne kërkojmë pavarësi të gjyqësorit për 7, 10 apo 15 vite, por kjo nuk ndodh sepse jemi vend shumë i vogël. Kam dyshime të mëdha nëse të gjitha këto procese të mëdha që po ndodhin në Shqipëri janë vërtet rezultat i vullnetit të prokurorëve tanë, apo vijnë si rezultat i informacioneve që vijnë nga partnerët tanë ndërkombëtarë, të cilat thjesht duhen zbatuar.
/vizionplus.tv
