Rasti i tre viktimave nga një shpërthim i dyshuar i hantavirusit në një anije turistike në Oqeanin Atlantik ka rikthyer diskutimet mbi rrezikun e përhapjes së infeksioneve në kroçera. Sipas ekspertëve, anijet turistike krijojnë kushte të favorshme për transmetimin e sëmundjeve për shkak të qëndrimit të gjatë të pasagjerëve dhe ekuipazhit në ambiente të përbashkëta dhe shpesh të mbyllura.
Megjithatë, Organizata Botërore e Shëndetësisë ka theksuar se rreziku për publikun nga hantavirusi mbetet i ulët dhe nuk ka arsye për panik apo kufizime udhëtimi. Ekspertët sqarojnë se jo të gjitha sëmundjet përhapen njësoj në kroçera, por disa infeksione janë më të zakonshme dhe transmetohen më lehtë në këto ambiente.
Sipas autoriteteve shëndetësore amerikane, problemet më të shpeshta në anijet turistike mbeten sëmundjet gastrointestinale, veçanërisht ato të shkaktuara nga norovirusi. Ky virus përhapet shumë shpejt në ambiente të mbipopulluara dhe shkakton simptoma si të vjella dhe diarre. Po ashtu, rrezik paraqesin edhe viruset respiratore si gripi, COVID-19 dhe RSV, të cilët favorizohen nga hapësirat e përbashkëta si restorantet, teatrot dhe kabinat.
Një tjetër rrezik lidhet me bakterin legionella, që mund të zhvillohet në sistemet e ujit të anijeve, si dushet, hidromasazhet apo tubacionet. Ndërkohë, pasagjerët mund të ekspozohen edhe ndaj sëmundjeve që transmetohen nga insektet gjatë ndalesave në porte të ndryshme, përfshirë dengën, virusin Zika apo malarien.
Ekspertët këshillojnë pasagjerët që të lajnë shpesh duart, të raportojnë menjëherë çdo simptomë në qendrën mjekësore të anijes, të shmangin kontaktet kur ndihen të sëmurë dhe të udhëtojnë të vaksinuar sipas rekomandimeve aktuale. Ata theksojnë se informimi dhe masat parandaluese mbeten mënyra më e mirë për të shmangur përhapjen e infeksioneve gjatë udhëtimeve me kroçera.
