Gazetari Ardit Hoxha, i ftuar në studion e Quo Vadis, të moderatores Pranvera Borakaj, në Vizion Plus, ka treguar se çfarë ndodhi ditën e protestës mes policisë dhe qytetarëve.
Hoxha tregoi me detaje atë që ndodhi pas mbarimit të fjalimit të Berishës, ku pati edhe përdorim molotovësh nga ana e protestuesve dhe gaz lotsjellës nga ana e policisë.
Pjesë nga biseda:
Borakaj: Ishe nga viktimat e gazit lotsjellës, çfarë solli ndryshe?
Hoxha: Ja kemi marrë dorën.
Borakaj: Kur ishte i skaduar, më mirë apo më keq?
Hoxha: Ky i skaduari ishte më agresiv, si në frymëmarrje, ashtu edhe në pasojat te sytë.
Borakaj: Ishte i nevojshëm përdorimi i gazit?
Hoxha: Absolutisht. Kemi dy momente. Momenti i parë është kur zoti Berisha mbaroi fjalimin dhe filloi hedhja e flakadanëve dhe molotovëve drejt Kryeministrisë. Policia bëri thirrje për të ndaluar molotovët, por nuk u ndalën.
Pas këtij momenti, kur bombat molotov mbaruan, zjarr kishte ende. Ndërhyri makina e policisë, e cila përdor ujë të përzier me piper, që shkakton irritim në fytyrë, dhe protestuesit u shpërndanë. Më pas edhe folësi bëri thirrje që të tërhiqeshin dhe të shkonin drejt Parlamentit.
Ne menduam se zoti Berisha do të bënte një xhiro te Parlamenti dhe pastaj te selia, por në atë moment filluan të shpërthejnë disa gazra lotsjellës. Në atë moment aty nuk kishte persona që mund të konsideroheshin të rrezikshëm. Para meje ka qenë zoti Berisha, në krah, përveç kolegëve, dy zyrtarë të lartë të PD-së, Bardhi dhe Boçi, qartazi njerëz politikë. Nga ky moment këtej, perceptimi i shpërndarjes drejt Parlamentit është proporcional.
Ajo që nuk e quaj normale është se, kur shpërndan turmën me ujë, pse përdoret edhe gazi lotsjellës.
Borakaj: Vetëm në këtë perimetër u përdor?
Hoxha: Unë përshkrova atë që pashë me sytë e mi. Më thanë që është hedhur edhe në pjesët e tjera.
