Konflikti ushtarak mes Shteteve të Bashkuara dhe Iranit po hyn në një fazë edhe më të rrezikshme, ndërsa sulmet ajrore vazhdojnë në natën e shtatë radhazi.
Tensionet janë shtuar ndjeshëm në zonën e Ngushticës së Hormuzit, një nga korridoret më të rëndësishme detare për transportin e naftës në botë.
Sipas mediave iraniane, bombardimet e fundit amerikane goditën objektiva në provincën Hormozgan, në jug të Iranit, ku humbën jetën tre persona dhe tetë të tjerë mbetën të plagosur. Shpërthime u raportuan edhe në qytetin Sirik dhe në ishullin Qeshm, pranë Ngushticës së Hormuzit.
🚨🇺🇸 🇮🇷 America wraps its SEVENTH straight night of strikes on Iran, reaching underground weapons storage.
-CENTCOM confirmed the seventh consecutive night concluded early Saturday local time
-The targets: surveillance sites, military logistics infrastructure, UNDERGROUND… pic.twitter.com/sCzf3x65Fp
— Mario Nawfal (@MarioNawfal) July 18, 2026
Komanda Qendrore e SHBA-së (CENTCOM) deklaroi se operacionet synojnë dobësimin e kapaciteteve ushtarake të Iranit dhe kufizimin e aftësisë së tij për të kryer sulme në rajon.
Në kundërpërgjigje, Irani njoftoi se ka goditur objektiva ushtarake amerikane në disa vende fqinje. Garda Revolucionare Iraniane tha se lëshoi raketa balistike dhe dronë ndaj bazave amerikane në Bahrein, duke përfshirë depo ushtarake dhe një qendër të inteligjencës.
Pas sulmeve, në Bahrein u aktivizuan sirenat e mbrojtjes ajrore, ndërsa autoritetet u bënë thirrje qytetarëve të strehoheshin në vendet më të afërta të sigurta.
Televizioni shtetëror iranian raportoi gjithashtu se janë goditur edhe baza ushtarake amerikane në Kuvajt dhe Jordani. Mes objektivave të përmendura janë bazat Al Udeiri dhe Ali Al Salem në Kuvajt, si dhe baza ajrore Al Azraq në Jordani. Irani pretendon gjithashtu se ka rrëzuar një dron amerikan mbi rajonin e Bushehrit, megjithëse ky pretendim nuk është konfirmuar nga Shtetet e Bashkuara.
Vëmendja ndërkombëtare mbetet e përqendruar te zhvillimet në Ngushticën e Hormuzit. Garda Revolucionare pretendoi se dy cisterna nafte shpërthyen pasi hynë në një zonë të minuar në jug të ngushticës, duke akuzuar SHBA-në për dhënien e udhëzimeve të rreme për lundrimin. Megjithatë, autoritetet iraniane nuk kanë bërë publike të dhëna mbi anijet apo ekuipazhet, ndërsa SHBA i ka mohuar këto pretendime.
Po ashtu, Irani njoftoi se ka ndaluar katër cisterna të tjera, duke pretenduar se ato po kalonin përmes Ngushticës së Hormuzit me mbështetjen e Shteteve të Bashkuara. Edhe për këtë rast nuk ka konfirmim të pavarur dhe nuk janë bërë publike informacione për identitetin e anijeve apo fatin e ekuipazheve.
Përshkallëzimi i konfliktit ka rritur shqetësimet e komunitetit ndërkombëtar, pasi çdo tension në Ngushticën e Hormuzit mund të ndikojë drejtpërdrejt në sigurinë e lundrimit dhe furnizimin global me naftë.
