Avokati Kujtim Ibraj e ka quajtur një bonus për kryeministrin Edi Rama ftesën e ardhur nga presidenti Donald Trump për t’u bërë pjesë e Bordit të Paqes.
I ftuar në Quo Vadis, të moderatores Pranvera Borakaj, në Vizion Plus, Ibraj tha se, pavarësisht deklaratave që bëhen, marrëdhëniet e Ramës me SHBA-të nuk kanë qenë asnjëherë të këqija.
Sipas tij, nuk ka vend për krahasime mes Ramës dhe Maduros apo mes Shqipërisë dhe vendeve të Amerikës Latine.
Pjesë nga biseda:
Ibraj: Si do të jetë Shqipëria në këtë marrëveshje? Rama do të shkojë si përfaqësues i shtetit shqiptar. Pasi Rama të kthehet, ajo marrëveshje do të diskutohet në Parlament.
Borakaj: Por edhe kjo nuk është normale, duhet transparencë.
Ibraj: Marrëveshja do të vijë, do të shihet dhe do të kalojë në Parlament. Në Parlament do të kalojë patjetër. Rama, me gjithë këto problematika që ka në qeverisje, i ka ardhur një bonus dhe normalisht po e shfrytëzon si çdo njeri. Nuk besoj se marrëdhënia e Ramës me SHBA-të ka qenë e keqe sa paraqitet, sepse nuk ka pasur asnjë deklaratë, përjashto një memo që iu paraqit të gjitha vendeve të botës. Në këtë fokus tani, SHBA-të janë përqendruar te vendet e Amerikës Latine, ndaj tregtisë së drogës. Por ne nuk mund të themi se Shqipëria krahasohet me Ekuadorin, Venezuelën apo vende të tjera të Amerikës Latine. Pavarësisht se kemi probleme me ligjin, nuk mund të krahasohet Rama me Maduron. A kemi probleme? Kemi pafund dhe duhet të përmirësohen, por nuk mund ta bëjmë të bardhën të zezë. Aleatët tanë janë Greqia, Italia dhe vendet e BE-së; këto vende na kontrollojnë. Ne nuk mund të quhemi një Venezuelë.
