Periudha e verës dhe temperaturat e larta shoqërohen dhe me një sërë problematikash shëndetësore në popullatë. Ndër to, janë edhe nishanet, të cilat fillimisht sipas mjekëve dermatologë mund të mos shfaqin shqetësime.
“Në përgjithësi nishanet nuk japin problematika dhimbje ose kruarje prandaj ajo që ne dermatologët fokusohemi më shumë janë ndryshimet që ne duhet të hasim ose që pacientët duhet të shofin tek një nishan, që janë të lidhura me simetrinë e nishanit, me bordurat, me ngjyrën e tij, me madhësinë e nishanit dhe me evoluimin e nishanit në përgjithësi”, Jorida Memini, mjeke dermatologe.
Mjekja dermatologe Jorida Memini thotë se njerëzit, sidomos ata që kanë një numër më të lartë nishanesh duhet të tregojnë kujdes të vecantë gjatë verës për shkak të ekspozimit ndaj diellit dhe të nxehtit.
“Duhet të jemi shumë të kujdesshëm me kremin e diellit në komplet trupin jo vetëm tek nishanet por sidomos tek nishanet. Në përgjithësi shoh paciente që i mbulojnë me ankeplaste me ngjica të vegjël. Ankeplastet nuk kanë filtra mbrojtës, shpeshherë ankeplastet mund ti traumatizojnë nishanet. Personat që kanë shumë nishane janë më të predispozuar për të ndryshuar, për të bërë nishane atipik kështu që ata duhet të jenë shumë herë më të kujdesshëm se pjesa tjetër që nuk kanë, megjithatë nuk duhet neglizhuar pacientët që kanë shumë pak nishane ose nishane që bien në sy. Megjithatë cdo njeri duhet të jetë shumë i kujdesshëm dhe cdo një vit duhet të kryej dermatoskopi”, tha mjekja.
Sipas mjekes Memini,vetëkontrolli është gjithashtu shumë i rëndësishëm nga ana e pacientit, me qëllimin identifikimin në kohë të nishaneve që kanë pësuar ndryshime.
“Vetëkontrolli është shumë i rëndësishëm sepse tek mjeku shkohet dy herë ose njëherë në vit për kryerjen e dermatoskopisë por në momentin që pacienti konstaton një nishan të ri ose një nishan ekzistues që ka ndryshuar dhe kjo bëhet nëpërmjet kontrolleve një mujore përpara pasqyrës sigurisht që i duhet dhënë rëndësia e duhur. Kanë filluar janë ndërgjegjësuar njerëzit , në verë njerëzit janë të rregullt me kremin e diellit”, deklaroi Memini.
Dermatologët këshillojnë që në rast të çdo ndryshimi në formë, ngjyrë apo madhësi të nishaneve, qytetarët të konsultohen sa më shpejt me mjekun specialist.
