Të huajt po blejnë gjithnjë e më shumë prona në bregdetin e Shqipërisë.Sipas të dhënave të Bankës së Shqipërisë, gjatë tre muajve të parë të vitit janë investuar 175 milionë euro në këtë sektor, duke e bërë atë më të preferuarin ndër të gjithë sektorët e ekonomisë dhe duke shënuar nivelin më të lartë të regjistruar ndonjëherë.
“Blerësit e huaj janë të përqendruar kryesisht në bregdet, një aset që shpesh mungon në vendet e tyre. Ata vijnë kryesisht nga Çekia, Polonia, Gjermania dhe vendet nordike, të cilët po blejnë në të gjithë vijën bregdetare. Ka ndikuar edhe përmirësimi i infrastrukturës në këto zona, si dhe potenciali që ata shohin për zhvillim, duke iu referuar edhe vendeve të rajonit ku çmimet janë disa herë më të larta se në Shqipëri”, tha Ervin Demirxhiu, ekspert i pasurive të paluajtshme
Prania në rritje e blerësve të huaj në bregdet po ndikon edhe në rritjen e çmimeve të apartamenteve në këto zona.
“Ka pasur ndikim të konsiderueshëm. Nëse do të mungonin blerësit e huaj, pesha e investimeve në pronat bregdetare do të ishte dukshëm më e ulët. Çdo rritje e kërkesës shoqërohet me rritje të çmimeve”, shtoi Demirxhiu.
Situata e krijuar ditët e fundit, lidhur me protestat që nisën kunder projektit turistik në Zvërnec, nuk pritet të ndikojë negativisht në interesin e të huajve për të blerë prona në bregdet, sipas ekspertëve.
“Çdo protestë ka një ndikim negativ në perceptim, por mendoj se kjo kategori blerësish nuk investon në projektet e resorteve luksoze që mund të preken nga këto zhvillime. Ata i kushtojnë më shumë rëndësi stabilitetit të tregut dhe besueshmërisë së ndërtuesve sesa zhvillimeve politike”, tha ai.
Megjithëse çmimet po rriten vazhdimisht, bregdeti shqiptar vijon të mbetet më i lirë krahasuar me vendet e tjera të rajonit, sipas të dhënave të platformës Numbeo, e njohur për krahasimin e kostos së jetesës dhe çmimeve të pasurive të paluajtshme në vende të ndryshme të botës.
