Një gjykatë në Moskë ka urdhëruar arrestimin në mungesë të vajzës së politikanit të vrarë të opozitës ruse, Boris Nemtsov, për rolin e saj në një “organizatë të padëshirueshme”, tha të martën shërbimi gjyqësor i Moskës.
Zhanna Nemtsova, e cila iku nga Rusia në vitin 2015 pas vrasjes së babait të saj, është bashkëthemeluese e Fondacionit Boris Nemtsov për Liri me seli në Gjermani, të cilin Rusia e shpalli “organizatë të padëshirueshme” në vitin 2024, duke ndaluar aktivitetet e saj në Rusi.
Nemtsova sfidoi vendimin e gjykatës së Moskës në një postim në Facebook:
“Tani jam e famshme. ‘Organizata e padëshirueshme’ është Fondacioni Boris Nemtsov, të cilin e themelova në Gjermani në vitin 2015. Është i regjistruar në Bonn, ku mbërrita sot me aeroplan”, shkroi ajo.
Rusia i etiketon rregullisht organizatat si subjekte “të padëshirueshme” që pretendon se dëmtojnë rendin e saj kushtetues ose sigurinë kombëtare. Qytetarët rusë mund të dënohen deri në pesë vjet burg për financimin e aktiviteteve të tilla ose deri në gjashtë vjet burg për organizimin e aktiviteteve të tilla.
Boris Nemtsov, një nga kritikët më të zëshëm të Presidentit Vladimir Putin, u qëllua dhe u vra më 27 shkurt 2015, ndërsa po ecte në një urë pranë Kremlinit.
Nemtsov ishte 55 vjeç në atë kohë dhe po shkruante një raport që shqyrtonte rolin e ushtrisë ruse në krizën ukrainase. Vrasja e tij shkaktoi tronditje në qarqet opozitare ruse.
Në vitin 2017, një gjykatë ruse shpalli pesë çeçenë fajtorë për vrasjen e Nemtsovit në këmbim të përfitimit financiar, por aleatët e politikanit të ndjerë thanë në atë kohë se ata që urdhëruan dhe organizuan vrasjen e tij nuk janë sjellë para drejtësisë.
