Autoriteti i Konkurrencës njoftoi se deri në datën 15 janar, tregu i produkteve ushqimore të shportës do të jetë në monitorim. Qëllimi është që të shmangen abuzimet e mundshme me çmimet, një fenomen që ndodh çdo fund viti.
“Do të kemi një sy dhe një vesh më shumë në pikat e shumicës. Do të kemi një njësi të posaçme për të parë nëse do të ketë abuzime me çmimet këtë fund viti. Në vëzhgim janë të gjitha tregjet dhe bizneset ushqimore. Ne duam që të ndërgjegjësojmë të gjithë tregtarët që të mos abuzojnë me pa të drejtë”, -sqaroi kreu i Autoritetit të Konkurrencës Denar Biba gjatë një interviste në Vizion Plus, për emisionin E-ZONE.
Por a kanë efekte paralajmërime të tilla për bizneset, teksa panorama e abuzimit të çmimeve përsëritet çdo fund viti?
“Një shprehje shqiptare thotë se frika ruan vreshtin. Ndaj e vërtet që mund të kesh shpëtuar pa u ndëshkuar një herë, dy, tre apo më shumë. Por ka gjithmonë një herë të parë dhe ajo mund të jetë aq penalizuese sa të kompensojë edhe herët e tjera që ke shpëtuar”, -tha Biba
Ky njoftim vjen në një moment kur autoriteti i konkurrencës mori vendim për të gjobitur gjashtë kompani grumbulluese në disa qarqe të vendit me 0.15% të xhiros së vitit paraardhës.
Por çfarë gjeti hetimi i konkurrencës në sjelljen e kompanive grumbulluese? Ato bashkërendonin qëndrimin në kurriz të fermerëve./vizionplus.tv
