Doktoresha shqiptare në Itali, Kozeta Proko i ka shkruar një mesazh kryeministrit Edi Rama për ta falenderuar për 30 mjekët dhe infermierët që dërgoi në Itali. Mesazhin e ka publikuar Rama në “Facebook”. Ajo shkruan se me këtë gjest Shqipëria tregoi edhe një herë virytet e saja dhe po ndihmon miken e saj të vjetër.
“I Nderuar kryeminister Rama,
Askujt nuk i shkonte ndërmend që Shqipëria, vendi i vogël përtej Adriatikut, i goditur vetëm pak muaj më parë nga tragjedia e tërmetit shkatërrimtar, të mund të gjente forcën e resurset e të dërgonte një ekip mjekësor prej 30 vetësh, për t’i qëndruar pranë mikes së vjetër e të shtrenjtë të të gjithë shqiptarëve, Italisë. Dita e re, këtu në provincën e Trevizos, të gjithë shqiptarëve, ne veçanti ne mjekëve shqiptarë qe jetojmë e punojmë në Itali, na gjeti krenar! Këta kolegë, me punën e tyre në shërbim të mbrojtjes së jetës, janë dëshmi e një prej cilësive më fisnike të popullit shqiptar…ndihmesën e mikut në ditë të vështira. Në çastet më të errëta të dallgëve të historisë, ne shqipëtarët kemi treguar virtytet tona më të mira.”
Duke përmendur sakrificën që mjekët dhe infermirët kanë kryer duke lënë pas familjet e tyre, doktoresha Kozeta Proko kërkoi që sakrificë të mos shkojë dëm por të qëndrohet në shtëpi.
“Jemi duke jetuar ditë të vështira, në një betejë që kërkon sakrificë prej secilit prej nesh. Nëse këta kolegë kanë lënë pas familjet e shtëpitë e tyre, në emër të betimit të shenjtë në mbrojtje të jetës, ju lutem qëndroni në shtëpi! Të kemi të gjithë besim tek masat mbrojtëse të menjëhershme që institucionet e Shqipërise ditën të ndërmerrnin, të cilat i përgëzoj. Për të mirën tonë, të familjarëve e të afërmve tanë, në respekt të sakrificës e punës së gjithë mjekëve, që fitorja e kësaj beteje të jetë sa më e afërt…QËNDRONI NË SHTËPI!!”
Të shtunën 30 mjekë dhe infermirë u nisën drejt Italisë për të ndihmuar në këto ditë të vështira. Pagat e tyre do të mbulohen nga buxheti i shtetit shqiptar.
