Programi i financimit “Dyfisho ndërmarrjen tënde” është gati dhe bankat presin aplikimet nga bizneset që plotësojnë kriteret.
Përfitues janë vetëm bizneset e vogla dhe të mesme, që duan të rriten dhe të zgjerojnë më tej aktivitetin.
Kushtet kryesore të programit përfshijnë disa lehtësira, ku më kryesorja është garancia që shteti ofron për kreditë që do të merren vetëm për investime, ndërsa normat e interesit janë më të favorshmet sot në treg.
Alban Zusi, nga Shoqata Eksportuesve, nga studio e emisionit “E-ZONE” shfaqi pakënaqësi mbi këtë program.
“Nuk është programi i duhur për sipërmarrjen. Në këtë program do të marrin pjesë vetëm ato biznese që janë në rregull financiarisht. Pra ata që janë në kushte normale të aktivitetit, të cilët maksimumi që përfitojnë janë normat e interesit. Kjo kategori biznesi edhe sot ka mundësi të kreditohet. Problemi qëndron tek bizneset që janë në vështirësi. Kjo kategori që është në masë në ekonominë tonë nuk ka nevojë për kredi dhe nuk bëhet dot pjesë e këtij programi. Asnjë bankë nuk krediton një biznes, që është në kushte të vështira”, tha Alban Zusi në Vizion Plus.
Sipas Zusit numri i aplikantëve dhe përfituesve do të jetë i vogël. Edhe pse qëllimi i programit është për të rritur dhe konsoliduar bizneset e vogla dhe të mesme, pak prej tyre janë në kushte për tu zgjeruar dhe për të marrë kredi
“Skema më e mirë për sipërmarrjen do të duhej të ishte 50% grant dhe 50% kredi. Jo të gjitha bizneset do të zhvillohen me kredi. Shumë prej tyre kanë nevojë për grante, ashtu siç janë zhvilluar bizneset në vende të ndryshme të botës”, sqaroi Zusi.
Struktura e bizneseve në vendin tonë është që 95% e tyre janë biznese të vogla dhe të mesme me më pak se 250 punëtorë.
Me integrimin në tregun europian shumë prej tyre nuk do t’i mbijetojnë dot konkurrencës. Në tregun europian do të mbijetojnë bizneset e mëdha dhe të konsoliduara në treg.
/vizionplus.tv
