Me masat e mbrojtjes personale, duke respektuar kushtet e sigurisë për shkak të epidemisë së shkaktuar si pasojë e COVID19, u zhvillua këtë të mërkurë në Universitetin e Mjekësisë konkursi i përzgjedhjes së specializimeve në Mjekësi.
Duke theksuar se fokusi këtë vit është vendosur te specializimi i mjekut të familjes, Manastirliu tha se degët që i janë kushtuar më shumë kuota janë ato specialitete që kanë më shumë nevoja.
“Edhe pse në kushtet e epidemisë, vendosëm që edhe këtë vit, për të pestin vit rradhazi të çelim konkursin e përzgjedhjes së degëve të specializimeve në Mjekësi, një proces transparent që udhëhiqet nga Rektorati dhe Universiteti i Mjekësisë. Janë 213 mjekë të rinj do të fillojnë procesin e specializimeve këtë vit. I kemi kushtuar më shumë vëmendje kuotave për specializimin e mjekut të familjes bazuar në strategjinë tonë të kujdesit parësor, si dhe specializimet e anestezi-reanimacionit, kardiologjisë, pediatrisë, mjekësisë interne, kirurgjisë. Do të vijojmë të ndjekim politikën tonë të hapjes së specializimeve në mënyrë që të vijojmë të kemi mjekë të specializuar dhe qytetarët ta marrin shërbimin aty ku jetojnë.”
Në ditën e përzgjedhjes së degëve për mjekët që nisin specializimin, Ministrja dhe profesorët e studentët e Universitetit të Mjekësisë gjithashtu kanë bërë homazhe për prof. Arjan Pushin, i cili humbi jetën një ditë më parë si pasojë e koronavirusit.
“Jam këtu për të nderuar prof. Arjan Pushin për kontributin e tij të çmuar në Universitetin e Mjekësisë dhe punën për shumë vite në spital. Duhet ta kthejmë këtë dhimbje në forcë për të vijuar luftën kundër COVID19. Sistemi shëndetësor vijon të jetë në gatishmëri dhe apelojmë çdo qytetar të respektojë masat për të kufizuar përhapjen e këtij virusi të rrezikshëm.”
