Një operacion i madh policor ka nisur në një zonë pyjore të Cornwall, Anglinë Jugperëndimore, pas gjetjes së disa trupave të pajetë.
Policia e Devonit dhe Cornwall është tashmë në vendngjarje, ndërsa ka mbështetje nga forcat speciale dhe ekipet mjeko-ligjore nga e gjithë Mbretëria e Bashkuar.
Hetimet janë fokusuar në pyllin Paramoor.
Komisionerja e Policisë dhe Krimit, Alison Hernandez, konfirmoi se më shumë se një trup ishte gjetur në pyll, por nuk mundi të jepte një numër të saktë.
“Ne kemi gjetur trupa të vdekur në pyll dhe po përpiqemi të përcaktojmë saktësisht se sa janë, kush janë dhe çfarë u ka ndodhur atyre”, tha ajo.
Zhdukja e 43-vjeçarit që çoi në zbulimin makabër
Sipas mediave britanike, hetimi filloi kur policia zbuloi trupin e 43-vjeçarit Daniel Coleman në pyllin Paramoor.
Coleman ishte zhdukur disa javë më parë nga zona e St Austell.
Autoritetet besojnë se burri u vra midis 2 dhe 7 korrikut. James Desborough, i cili është akuzuar tashmë për krimin dhe është lënë në paraburgim, besohet të jetë përgjegjës për vrasjen e tij.
Por tre javë më vonë, çështja mori një kthesë shumë më të errët.
Mediat britanike raportojnë se ky është një nga rastet më serioze dhe më komplekse të vrasjeve të shumëfishta dhe nuk përjashtohet mundësia që të gjitha krimet të jenë kryer nga një vrasës serial./vizionplus.tv
