Këto janë pamjet e operacionit të zhvilluar një ditë më parë në Elbasan ku u arrestua 53-vjeçari, Ardian Çapja, një nga emrat më të njohur të botës së krimit.
Në videon e shpërndarë nga policia shihen Forcat RENEA, të cilat kanë rrethuar të gjithë kompleksin ku banon fisi Çapja, ndërsa kanë bërë të mundur prangosjen e Ardian Çapjas gjatë orëve të para të mëngjesit.
Ky është momenti, kur 53-vjeçari më pranga në duar dhe masa të shumta sigurie shoqërohet në komisariatin e policisë në Elbasan. Gjatë operacionit të koduar “krasta 2021”, krahas armës së zjarrit tip kallashnikov, u gjetën dhe pesë radio si dhe disa uniforma policie.
Ndërkohë krahas Çapjas, në pranga përfundoi dhe roja i tij, Ardi Çekani. Ai ishte shpallur në kërkim pasi gjykata e ka dënuar me 1 vit e 6 muaj burg për veprat penale “Dhunë në familje”, “Kundërshtimi i punonjësit të policisë së rendit publik” si dhe “Veprime në kundërshtim me vendimin e gjykatës”. Në momentin e kapjes, Ardi Çekanit iu gjet dhe një sasi e vogël lëndë narkotike kanabis.
Ndërkohë vazhdon puna për kapjen Florenc Çapjas. Ardian Çapja dhe nipi i tij, Florenci, akuzohen se kanë qenë porositësit e vrasjes së Gentian dhe Nezir Beqirit në vitin 2012.
