I dërguari i Bashkimit Evropian për dialogun Kosovë-Serbi, Peter Sorensen, ka zhvilluar një vizitë të paparalajmëruar në Prishtinë, ku është takuar me kryeministrin në detyrë, Albin Kurti.
Në fokus të bisedimeve ishte çështja e gjyqtarëve dhe prokurorëve serbë që dhanë dorëheqjen në vitin 2022 dhe që tashmë kërkojnë rikthimin në sistemin e drejtësisë.
Sipas Zyrës së Kryeministrit, Sorensen u interesua për qëndrimin e Kosovës lidhur me riintegrimin e tyre, ndërsa Kurti ritheksoi se është i hapur për përfshirjen e serbëve në sistemin gjyqësor dhe prokurorial, por jo për rikthimin automatik në detyrë.
“Dorëheqjet kolektive të para katër viteve në veri të Ibrit kishin pikërisht si synim rrënimin e përbërjes shumetnike të sistemit tonë demokratik. Tani, rruga përpara është ajo që e përcaktojnë Kushtetuta dhe ligjet e Kosovës, e cila në rastin e sistemit gjyqësor nënkupton ruajtjen e shumetnisë, por njëkohësisht edhe garantimin e pavarësisë dhe cilësisë së drejtësisë”, ka thënë Kurti.
Vizita e Sorensenit u zhvillua në të njëjtën ditë kur Kurti dhe ushtruesja e detyrës së presidentit, Albulena Haxhiu, i kërkuan Këshillit Gjyqësor të Kosovës të procedojë me lirimin nga detyra të gjyqtarëve serbë të dorëhequr, pavarësisht thirrjeve të Bashkimit Evropian që kjo çështje të trajtohet në kuadër të dialogut mes Kosovës dhe Serbisë. Deri më tani, Peter Sorensen nuk ka bërë një deklaratë publike lidhur me vizitën e tij në Prishtinë.
