Miratohet marrëveshja me SHBA, ministri i Mbrojtjes: Investim strategjik për sigurinë kombëtare!
Ministri i Mbrojtjes, Ermal Nufi, ka reaguar pas ratifikimit në Kuvend të Marrëveshjes së Huasë direkte mes Shqipërisë dhe Shteteve të Bashkuara të Amerikës.
Me anë të një postimi në rrjetet sociale, Nufi e ka cilësuar marrëveshjen një moment historik për vendin.
Ministri thekson se marrëveshja nuk përfaqëson vetëm një instrument financiar, por një investim strategjik që do të kontribuojë në forcimin e sigurisë kombëtare në kuadër të NATO 3.0.
POSTIMI I MINISTRIT NUFI:
Ratifikimi i sotëm nga Parlamenti i Marrëveshjes së Huasë direkte mes Shqipërisë dhe SHBA është një ngjarje historike!
Që nga rivendosja e marrëdhënieve diplomatike me SHBA në 1990-tën, pas anëtarësimit në NATO, ky është akti më testimonial i mbështetjes ndaj Shqipërisë në terma konkretë dhe financiarë.
Ajo nuk është thjesht një instrument financiar, por një investim strategjik për:
sigurinë kombëtare në kuadër të NATO 3.0 dhe angazhimit të vendit tonë si aleat i përkushtuar në #Aleancë;
forcimin e kapaciteteve dhe modernizimin e Forcave tona të Armatosura;
thellimin e partneritetit strategjik të Shqipërisë me aleatin tonë më të rëndësishëm në siguri dhe mbrojtje, Shtetet e Bashkuara të Amerikës.
/vizionplus.tv
