Të shtëna me armë zjarri janë raportuar në orët e para të mëngjesit pranë konsullatës së Shteteve të Bashkuara në Toronto, në incidentin e dytë të këtij lloji brenda pak muajsh.
Policia kanadeze bëri të ditur se nga ngjarja nuk pati persona të lënduar. Sipas autoriteteve, rreth orës 04:46 me orën lokale, efektivët dëgjuan të shtëna në zonën pranë godinës diplomatike.
Menjëherë pas ngjarjes, një automjet i bardhë pa targa u pa duke u larguar me shpejtësi nga vendi i ngjarjes. Policia nisi ndjekjen, por drejtuesi i mjetit arriti të largohej.
Zona përreth konsullatës u izolua nga autoritetet, ndërsa në vendngjarje u gjetën gëzhoja armësh. Deri tani, motivi i sulmit mbetet i paqartë dhe hetimet vijojnë për identifikimin e autorëve.
Ky është incidenti i dytë ndaj konsullatës amerikane në Toronto brenda një periudhe të shkurtër. Në mars, objekti diplomatik ishte gjithashtu në shënjestër të të shtënave, ndërsa në lidhje me atë ngjarje dy persona, 18 dhe 19 vjeç, u arrestuan në muajin qershor si të dyshuar.
Pas episodeve të fundit, autoritetet kanë forcuar masat e sigurisë pranë misioneve diplomatike amerikane dhe izraelite, në një kohë kur tensionet ndërkombëtare vijojnë të jenë të larta për shkak të zhvillimeve në Lindjen e Mesme.
