Drejtuesi politik i Partisë Socialiste Erion Veliaj, pas fitoreve të thella në Njësinë 10 dhe Bërzhitë, ka shpallur rezultatin fitues për Partinë Socialiste edhe në Njësinë 12.
“Super rezultat tek Njësia 12, duke thyer rekord për Partinë Socialiste e duke fituar 55% te zona e Freskut. Falenderoj me zemër të gjithë ata që na kanë dhënë kaq shumë besim e mbështetje. E kemi lexuar me shumë kujdes edhe mesazhin që na ka dhënë pjesa tjetër e cila pret më shumë. Ne do u shërbejmë edhe atyre që na kanë votuar edhe pjesës tjetër që mendon ndryshe dhe që pret më shumë nga ne,” u shpreh Veliaj.
Ermonela Felaj, kandidate në këtë zonë për Partinë Socialiste tha se diferenca me PD është gati dyfish.
“Njësia 12 ka bërë një fitore spektakolare për Partinë Socialiste. Janë 3650 vota për Partinë Socialiste, vetëm gjysma e tyre për Partinë Demokratike dhe vetëm 500 për LSI,” tha Felaj.
Veliaj i bëri thirrje Partisë Demokratike të vijojë me procesin e numërimit, sidomos në ato KZAZ ku komisionerët e opozitës kanë shumicën, ku ka dhe më shumë probleme.
“Do doja të kishte një reflektim nga PD. Duhen dy palë për të numëruar votat. Ligji thotë që nëse dikush ka nevojë të pushojë mund të zëvendësohet. Është shumë e rëndësishme që ne te kthehemi në punë dhe dua që kjo të ndodhë për gjithë kolegët,” tha Veliaj.
