Presidenti i Ukrainës, Volodymyr Zelensky, ka nënshkruar një dekret për shkarkimin e ambasadores së vendit në Shtetet e Bashkuara, Olha Stefanishyna.
Vetë Stefanishyna deklaroi se largimi i saj ishte një vendim personal dhe jo rezultat i presioneve politike, duke theksuar se do të vazhdojë të punojë në shërbim të Ukrainës nga çdo detyrë që do t’i besohet.
Shkarkimi i saj vjen në një periudhë riorganizimesh në qeverinë dhe udhëheqjen ushtarake të Ukrainës, ndërsa posti i ambasadorit në Uashington konsiderohet kyç për marrëdhëniet me aleatin më të rëndësishëm të Kievit.
Në një postim në Facebook, Stefanishyna shpjegoi se vendimi për t’u larguar lidhej me arsye personale, të cilat, sipas saj, i kishte bërë të ditura më herët.
Ajo bëri edhe një bilanc të punës së saj, duke veçuar tre arritje kryesore: rritjen e ndihmës ushtarake amerikane për Ukrainën, institucionalizimin e mbështetjes së SHBA-së përmes mekanizmave ligjorë dhe përmirësimin e imazhit të Ukrainës si një vend ku investohet dhe zhvillohen teknologji, e jo vetëm si përfitues ndihmash.
Ambasadorja falënderoi stafin e ambasadës për bashkëpunimin dhe u shpreh e gatshme të vijojë kontributin e saj për vendin.
Vetëm pak ditë më parë, më 30 korrik, Stefanishyna kishte mohuar zërat se presidenti Zelensky i kishte kërkuar të jepte dorëheqjen.
Në të njëjtën kohë, ajo konfirmoi se po zhvillohej një verifikim lidhur me deklarimin e pasurisë së saj, duke e cilësuar procesin si një procedurë normale dhe duke deklaruar se ishte e gatshme të bashkëpunonte me autoritetet.
Olha Stefanishyna u emërua ambasadore e Ukrainës në SHBA në gusht të vitit 2025.
