Nënkryetari i LSI, Petrit Vasili tha se qeveria nuk po merr masat e duhura për përballimin e pandemisë. Në një deklaratë për mediat pas vendimit të Komitetit të Ekspertëve për të lënë në fuqi masat shtrënguese anti-COVID, Vasili i quajti ato si masa elektorale.
“Janë masa shtrënguese politike dhe elektorale, pasi efekti i tyre ka qenë pothuajse zero. Shqiptarët nuk presin të dëgjojnë pallavra të orës 6, të orës 8, të orës 9, të orës 11, të orës 12 e të tjera, sepse i kanë dëgjuar dhe i kanë provuar. Shqiptarët presin ndihmë ekonomike të drejtpërdrejtë për rimbursimin e barnave dhe shërbimeve shëndetësore, të mijëra qytetarëve që trajtohen në banesat e tyre dhe janë të infektuar me Covid-19. Shqiptarët nuk mbajnë më, shqiptarët nuk mund të shikojnë grupe të falimentuara pseudospecialistës, zëdhënës të qeverisë të cilët flasin e këpusin broçkulla me kufizime oraresh pa asnjë vlerë, që kanë treguar se janë një dështim i plotë. Presin të dalë kryeministri i tyre, ky llafazan profesionist që bën poza para një kutie vaksinash dhe që ndan shqiptarët në ata që mund ta bëjnë dhe ata që s’duhet ta bëjnë jashtë çdo kriteri shkencor.”
Numri dy i LSI garantoi se opozita po bën detyrën e saj dhe se nuk do të lodhet derisa të fitojë zgjedhjet më 25 prill.
