Deputetja e Partisë Socialiste, Elisa Spiropali, i është përgjigjur thirrjes së kryeministrit Edi Rama për “draftin e Shqipërisë së re”, duke deklaruar se një “Marrëveshje e Re” për vendin do të realizohet.
Në një reagim në rrjetet sociale, Spiropali theksoi se Shqipëria duhet të bëhet më e hapur, më e drejtë, më meritokratike dhe më europiane.
Në postimin e saj, ajo nuk i kurseu kritikat për Partinë Socialiste, duke iu përgjigjur kryeministrit Edi Rama, i cili një ditë më parë u shpreh: “Është edhe një thirrje për një Shqipëri të re, dhe ka dhe disa shpirtra të humbur në partinë tonë, që duan një Shqipëri të re. Mezi pres që të na e sjellin draftin e Shqipërisë së re të shkruar. Por kam frikë se nuk do vijë kurrë, sepse Shqipëria e re është si të gjitha siluetat e flamingove, njërën prej të cilave e mbante Fatos Lubonja. Fatosi poshtë, flamingo lart dhe ‘hi hi hi hi Shqipëria e re’. Do kritikohemi e sulmohemi, por kemi detyrimin të mos zgjedhim rrugën e lehte, të mos zgjedhim të jemi popullorë, kur duhet të jemi të përgjegjshëm”.
Spiropali shtoi se për këtë, Partia Socialiste duhet të “mbledhë mendjen”, të vetëpastrohet dhe të bëhet më dinamike e më demokratike.
Elisa Spiropali:
“Po, do ta kemi Marrëveshjen e Re për Shqipërinë.🇦🇱
Shqipërinë që duam të ndërtojmë, duhet ta bëjmë, dhe do ta bëjmë, më të hapur, më të drejtë, më meritokratike, më europiane.
Për ta arritur këtë, Partisë Socialiste i duhet të gjejë forcat, të mbledhë mendjen, të vetëpastrohet, të bëhet më dinamike, më demokratike, më kompakte, për të mbetur gjithmonë e re, gjithmonë e pastër, pa smërçe, pa ndryshqe, pa pehlivanllëqe.
Ta bëjmë Marëveshjen e Re të madhe, të thellë, të vërtetë, duke pasur parasysh, se po nuk lartësuam veten, nuk mund ta përmirësojmë vendin.”
/vizionplus.tv
