Policia e Tiranës ka proceduar penalisht në gjendje të lirë 9 shtetas, të cilët, sipas autoriteteve, pas përfundimit të tubimit të zhvilluar më 20 qershor 2026, kanë qëndruar në mënyrë të kundërligjshme në bulevardin Dëshmorët e Kombit, duke penguar qarkullimin e automjeteve dhe duke prishur qetësinë publike.
Sipas njoftimit zyrtar, personat e proceduar kanë tejkaluar orarin e njoftuar për zhvillimin e tubimit dhe kanë zaptuar hapësira publike duke vendosur karrige metalike dhe sende të tjera në bulevard.
Konkretisht, shtetasit: Sh. G., 32 vjeç, A. G., 56 vjeç, A. B., 25 vjeç, V. K., 28 vjeç, G. K., 30 vjeçe, A. K., 43 vjeç, E. S., 36 vjeç, A. K., 34 vjeç dhe R. Sh., 22 vjeç.
Policia bën të ditur se, pavarësisht thirrjeve të përsëritura për lirimin e hapësirës dhe respektimin e ligjit, ata kanë refuzuar të largohen dhe kanë vijuar qëndrimin në zonë.
Autoritetet njoftojnë se puna vijon për identifikimin e personave të tjerë që mund të kenë kryer veprime të kundërligjshme gjatë tubimit.
Materialet procedurale do t’i referohen Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprat penale “Pengimi i qarkullimit të mjeteve të transportit”, “Prishja e qetësisë publike” dhe “Organizimi dhe pjesëmarrja në grumbullime të paligjshme”.
