Dy persona janë arrestuar nga policia e Kolonjës pasi kanë terrorizuar fshatin e tyre Novosele duke qëlluar me armë në ajër.
Ngjarja e cila ka shkaktuar panik tek banorët e zonës është regjistruar në orët e vona mes të premtes dhe të shtunës.
Policia ka arritur të identifikojë dhe te arrestojë në flagrancë dy autorët e dyshuar S. Z., 36 vjeç dhe M. Z., 34 vjeç, banues në Novoselë.
Dy vëllezërit kanë kundërshtuar punonjësit e policisë, në momentin kur forcat do të ushtronin kontroll në banesën e tyre, ku konkretisht u gjetën e sekuestruan në cilësinë e provës materiale dy armë zjarri tip pushkë, një pistoletë tip “Zastava” me 4 fishekë, si edhe 1572 copë fishekë, të cilat i posedonin pa leje.
Nga veprimet hetimore rezultoi se dy shtetasit e mësipërm, kanë qëlluar me armë zjarri në ajër duke prishur qetësinë publike, ku si pasojë e të shtënave një predhë ka rënë në banesën e shtetasit Q. B., pa shkaktuar dëme.